![](https://nru-school.uz/wp-content/uploads/2022/09/image.png)
Har yili sentabr oyining avvalida odat bo’lganidek bugun, 5-sentabrda yurtimizdagi barcha ta’lim muassasalari singari «TIQXMMI» MTU qoshidagi aniq fanlarga ixtisoslashtirilgan maktabda ham «Bilimlar kuni» bayram tadbiri bo’lib o’tdi.
![](https://nru-school.uz/wp-content/uploads/2022/09/image-2.png)
Dastlab butun yoz davomida miriqib dam olib, yangi bilimlarni o’zlashtirish uchun kuch-g’ayratga to’lib qaytgan maktab o’quvchilari ustozlarimiz tomonidan har galgidanda iliq kutib olindi. Ayniqsa, maktabga yangi qabul qilingan, qabul imtihonlarida eng kuchlilari sifatida qayd etilgan 7-sinf o’quvchilari uchun bu kun unutilmas bo’ldi.
![](https://nru-school.uz/wp-content/uploads/2022/09/image-4.png)
![](https://nru-school.uz/wp-content/uploads/2022/09/image-3.png)
Tadbir avvalida maktab direktori K.E. Kubyashev yangi o’quv yili bilan o’quvchilar, ota-onalar hamda ustozlarni qutlab tadbirni ochib berdi. Maktab direktori o’z nutqi davomida maktabning respublikamizda tutgan o’rni, o’tgan yilgi muvaffaqiyatli natijalari, xususan, 2021-2022- yilgi o’quv yilida fizika fan olimpiadasida respublika miqyosida erishilgan yutuqlari haqida so’z yuritdi. Shuningdek, maktabning bu yildagi maqsad va rejalari, o’quvchilar, ularning ota-onasi hamda ustozlarga qo’yiladigan talablar haqida ham fikr yuritildi.
![](https://nru-school.uz/wp-content/uploads/2022/09/image-6.png)
Tadbirni ixtisoslashtirilgan maktab IFBDO’ G.Z. Igamberdiyeva bir nechta tilda, xususan, o’zbek, rus va fransuz tillarida olib bordi. Tadbir davomida 2021-2022- o’quv yilida o’zining ulkan salohiyati bilan namuna ko’rsatgan o’quvchilar tantanali ravishda faxriy yorliq bilan taqdirlandi, jumladan, o’tgan yilgi universitet stipendiantlari, namunali hamda maktab hayotida faol ishtirok etgan yigit-qizlar shular jumlasidandir.
![](https://nru-school.uz/wp-content/uploads/2022/09/image-9.png)
![](https://nru-school.uz/wp-content/uploads/2022/09/image-8.png)
Undan so’ng, 8-sinf o’quvchilari Nuriddinova Fotima va Zuhra ijrosidagi milliy raqs barcha yig’ilganlarga ko’tarinki kayfiyat bag’ishladi. Tadbir davomida ustozlar hamda ota-onalar tomonidan bayram tabriklari bildirildi.
![](https://nru-school.uz/wp-content/uploads/2022/09/image-10.png)
Tadbir so’nggida, «Birinchi qo’ng’iroq» yangradi hamda o’quvchilar «Yangi O’zbekistonda el aziz, inson aziz» shiori ostidagi Mustaqillik darslariga kuzatildi.